اشعار التجاني حاج موسي

بعد ما فات الاوان
من بعد ما فات الأوان
الليله جاى بتعتذر
ترجع أيامنا الزمان
من وين نجيب ليك العمر

وفرحت بيك مديت
دروب الريد سماح
وغزلتا ليك طيبة
مشاعرى غطا ووشاح
لكنى وآ ضيعة رجاي
رديتنى مكسور الجناح
وسقيتنى بعد الحلوة مر
من وين أجيب ليك العمر ؟

يا البي غرورك كم قسيت
كان ظنى فيك تكون حنين
فى سكة الشوق بالسنين
وبراى بالنار إنكويت
وصليتنى بعد الفرقة بين
لحد ما كمل الصبر
من وين أجيب ليك العمر ؟

قصر الشوق
أقول أصبر على الهجران

أقول أنســـــــــــــاك لا بدا

أشوف بس طرفك النعسان

تخوني القوة والشـــــــدة

تصبر قلبي على الهجران

يثور مــــــاضينا ويتحدى

يا قصر الشوق لو هـداك

حبيبك ومر ليك صـــــــدا

بأبنيك بغلاوة الـــــــــريدا

مــــحال أنا قصري يتهدا

أهي الأيام بــتــــتــعــــدى

ونـــرجع تاني لا بــــــــدا

وحات عمراً قضيتوا معاك

محــــال عن ريدك ارتــــدا

وراجي العين تلاقي العين

وأحضــــــــن إيدك البضة

وأهي الأيـــــــــــام بتتعدى

ونرجع تــــــــــــــاني لابدا

باب الريده وإنســـــــــــــدا

نقول ياربي إيه جّــــــــــــدا

تمر أيـــــــــــام وتــــــتعدى

ونقعــــــــد نحسب في المدة

مهما أجــــــــــــرب النسيان

ألأقي الشــــــــــــــــــوق يمتد

ما باب الريـــــــــــــدة وإنسد

جاي تفتش الماضي

وجايى تفتش الماضى ؟

خلاص الماضى ولىَّ زمان ،

وجفت مقلتى الباكية ..

ونامت من سنين أحزان ،

وجاى تفتش الماضى ؟

**

أرجع بالزمن مرة وأتذكر حكايتى معاك ..

تلاقى القصة – جد – مره

هل راعيت شعور مضناك؟!

كلما تزيدنى فى هجرك

أقول ليك زيدنى ما أحلاك

لا شفع التوسل فيك .. ولا حرمانى يوم هماك

وجاى تفتش الماضى ؟

وجيت تترجى بالدمعات...

أسامحك أنسى أغفر ليك ؟

جفف دمعك الغالى ..

مسامحك وما عشان عينيك..

عشان تتعلم الغفران..

وتصفح لو زمن جار بيك

وحاول لو قدرت كمان

تقدر رقة الحابيك

وجاى تفتش الماضى ؟

وعزة نفسى مابيه على

أسلم قلبى ليك تانى..

سنين الهجر بيناتنا

وحاجات تانية حاميانى

ولو رجع الحنين وعاود

وليك من تانى ودانى

ولو مكتوب ليَّا تانى أحب

بحب إنسان يكون تانى

واحشني
واحشنى يا الخليت ملامحك .. فى حياتى ، …

واحشنى يا الرسيت مراسيك .. ..جوة ذاتى ،

الا باكر لما ترجع ، … أنا بحكى ليك عن الحصل ، ..

وعن بعد المسافة وقربها

ولمن يفارق زول عيون ..غاليات عليهو كتير خلاص وبحبها …

والله أحكام يا قدر …والله أحكام يا مسافة ويا سفر

***

وانت لما بتسيبنى وتسافر ..

خت فى إعتبارك ، ..انو دنياى فى مدارك

وجد- لفافات الصبر دخنتها ..

وكل المقاطع فى غناى طوعتها

وغريبة غنت ، … فرحة ... لا ... لا .. غربة ..لا....لا ..

تقصد شنو ما عرفتها

وأهى تجربة ..... خطيرة – جد – وأجتزتها ..ولسة واحشنى

أعذريني
أعذرينى
لو عيونى .. غصب عنى
وقفو فى عيونك شويه
وسانحينى لو مشاعرى
فاتوا منى وغازولكى بحسن نيه
شايله فى عيونك شقايا
ارحمينى وارتى ليا
عارفه لما تفوتى تمشى تودعينى
تانى ترجع لى سنيني
واصحى تانى
وأبدا من أول اعانى
وابقى مصلوب فى الثوانى
شان تجينى وتنقذينى
يا ملازى ويا خلاصى ويا يقينى
خلصينى
أصلى غرقان فى الأسيه
وأعذرينى لو عيونى
ارتاحوا فى عيونك شويه .

السودان الجديد
يا جمالك يا بلادى جيت أغنيلك نشيد ….

ما خلاص نادى المنادى ( اتولد سودان جديد (

***

لو عذابك طال كتير وبالسنين مستحملا هو ..

وضقتى ويلات السعير وشفتى من الويل شقاهو

الشروق ساطع منير والأرض مستنياهو .

يبقى كل الجاى خير يمسح القبلو ووراهو

***

وأنت يا شعبي النبيل فيك ملامح ما بتزول ..

أنت من أصلك أصيل خاتى كلماتة وخاتى قول

أنت يالدغرى وعديل انت يا العارف الاصول ..

يشهد التاريخ قبيل فيهو مثلت الفصول

***

نحن لو كان يوم سهينا مرة فى عمر الزمان ..

نحن عهدك مانسينا ولما حان يوم الآوان

جينا من غربتنا جينا وتانى لى نفس المكان …

أتحدنا وبي أيدينا بنغسل الزل والهوان

***

وابدأ أفرح بيك واغازل …

يا وطن بالعزة حافل ..وافتخر بيك فى المحافل

وازرعك ورد وسنابل .. يا وطن عارفك مناضل ..

والبخونك يبقى هازل ..يبقى مكتول وابقى كاتل

***

وانظم الافراح نشيد ..ما خلاص نادى المنادى .

أتولد سودان جديد ..أتولد سودان جديد

الحب الكبير
يا بلادى الطيبة جيتك .. عندى ليك كلام كتير .

أصلى من بدرى أحتويتك ..أنتى يا حبى الكبير

***

كنت قبل سنين طويلة

…كنت زول هانى وغرير …وكانت الأيام جميلة

والبلاد مليانه خير …والوطن كلو القبيلة ..

غيرو ما بنرضى البديل

والنفوس كانت نبيلة ….عامره بالحب الكبير

***

السنين لفت ودارت ..وعجلة الدنيا بتدور ..السنين كتبت وقالت

نحنا شعب صحيح جسور .. ولو خطوب الدهر نالت

من صفاك لازم نثور …والبدور يزرع ويحصد ..ما بيزع بالقشور

***

ما بلادنا الطيبة جنة .. عامرة بالخيرات سخية ..

وأنتو طيبين يا أهلنا ..بى خصال راسخة وقوية

لو قبيل كنا أنشغلنا ..عن حبيبتنا الوفية ..

ليكى جابتنا المحنة ..والعرق مهرك هدية

الياسمين

معزورين ، ولو عارفين حكايتى معاهو ، …

تعزرونى لانو الما سقا الياسمين

ما بعرف غلاوة الند .. ولا بعرف نداوة خد ..

ولا بعرف كلام العين .. ومعزورين

أريتكم مرة مرة شفتونى … وبينى وبينو بس خطوات ..

زى عابد وقف بيأدى فى صلوات ..

وزى والد همس لى جناهو بى دعوات

…قولو على لو قايلين .. معزورين ، وما عارفين

لانو الماسقا الياسمين ..

ما بعرف غلاوة الند ..ولا بعرف نداوة خد ..

وما بعرف كلام العين .. معزورين

منو الفيكم بساهر الليل …يبارى سحابة لما تشيل

…ويتبع نجمة ضواية مداها بعيد بعيد بلحيل

وقولو على لو قايلين .. معزورين وما عارفين …

لانو الما سقا الياسمين ،

ما بعرف نداوة خد .. وما بعرف غلاوة الند ….

ولا يعرف كلام العين

حبايبناحبايبنا ..قرايبنا .. وتخاصمونا ..وخصامكم لما زاد طول ..

ولمن أنتو فى الأول جرحتونا

قلنا أقلو نتلاقى .. تعاتبونا... تلومونا

.... وفى الأخر تصالحونا .. حبايبنا

تغلطوا انتو ونسامح …ما بنقدر نخاصمكم ..

ما اصلو الهوى الجامح ..

بينسينا الخصام كلو ..ويهون ظلم الهوى وذلو ..

والضقناهو من مرو

لما عيونك الحلوين تصابحنا ..نرجع نحن مجبورين

…نسامحكم ..... حبايبنا

ولمن زاد خصامكم لينا فات حدو ..

والقايلنو ببقى هظار … أسفر لينا عن جدو

بحر ريدكم وانتو بعاد ..يوماتى بيزيد حدو ..

ولما عيونك الحلوين تصابحنا

نرجع نحن مجبورين ، ..نسامحكم ....

حبايبنا ..وقرايبنا ، …وتخاصونا

شقا الايام

شقا الأيام .. وسهر الليل .. بهون لو مرة حسيت بى

.. يزول كل الوجع وأرتاح ..

وأغرد زى كنار صداح .. وتبقى الدنيا فى عينى

... أزاهر وغيمة وردية .. ولو سلمت مرة على ..

سلامك ليا عيديه...

**

شقا الأيام وسهر الليل .. وآهاتى الحزاينية

.. ملازمنى من يوم شفت عيونك الحلوة ..

ويومها عرفت كيف العين مكامن ريد.. وجرة نمة من دوبيت

.. ضراعة فاتحة يوم العيد

فرح أطفال … وأهازيج زار ونقرة طار .. وبحة ناى

... حزين غناى .. ترانيم غنوة دينية

**

براى ... والليل .. وأهاتى الحزاينية ، بيغشاني النعاس مرات ..

وطيفك يمر.. يغافلني.. يبدل حزني اشراقات

وأبداء معاك غناوى الليل ..وأغالب الدمعة مابيه تسيل

.. أتارى الليل كمل كلو ؟! عيونك مرة لو طلو ..

يزول كل الوجع وأرتاح... وأغرد زى كنار صداح..

وتبقى الدنيا فى عينى .. أزاهر وغيمة وردية ..

ولو سلمت مرة على .. سلامك ليا عيدية ..

والله ايام يا زمان

والله ايام يا زمان ..ببكى وبتحسر عليك وما بقول العشنا ،

كان ..وارمى حبة لومى فيك

ولسه راجيك يا زمان ..بى حبة الذكرى المعاى ..

عايشة فى وجدانى لسه ..جوه بتدغدغ حشاى

يمكن الحبيتو مرة ..يلقى فى كلمات غناى ..فاصلة بتصحى المشاعر

وجايز الطول سهادو ..تغشى ليلاتو البشاير ـ

ويمكن الفرح الزمان ..باقى اصداهو بترن

غنوة حاضانها الضفاير ..والله ايام يا زمان

**

جايز الايام تحن ..وتصحى فيك نبض المشاعر ..

ويمكن المجروح يئن ..تغشى ليلاتو البشاير

ويمكن الفرح الزمان ..باقى اصداهو بترن ..غنوة حاضناها الضفاير

والله ايام يا زمان

جواب للبلد

ضل الضحى الرامى وشمس شتويه دفايه
وريحة البن لما يفوح فى قلايه
وفروة جدى صورة جدى لمن جيت أمد يدى :
( جدى أدينى تعريفه )
( بتقرا الحمدو يا المبروك )
( بقراها شان تعريفه ألقاها )
بجود فى القرايه كمان
وايه يا يمه والله زمان!!
وسبحة ( بنت الفكى )
والطورية والواسوق
وسعف حبوبة والكوريه والحنقوق
وصوت ( سعدية ) بت جيرانا
تشحد ليها فى طايوق
وصوت ( عرفه ) لما تخمج الدلوكه غنايه
وحبة فريك لموه لى رمضان
مصرور فى مخلايه
صور محفورة جوايا ومن يوم داك
ولى الليلة ولى بكرة وبعد باكر
شان الزمن غدار وما معروف
زمن مكار .. زمانا كلو خوف فى خوف
وايه يا يمه والله زمان
مشتاق يمه لى ملاح النعيميه
وريحة صاجك المحروق ولما تسوى طعمية
وغباشة روب وعنزه حلوب
بدور ارجع اجيكى هناك ضاقت بيه يا يمه هنا
بدور لتمسى بعيونك واصابحك يا حبيبتى انا
صباح الخير على عيونك
اتارى الدنيا من دونك شينة ومره ما بتندار
ومرة مرارة يا يمه دي مرة وحارى زى النار
ولو بتدورى احكيلك كيف احوالى فى البندر
من وين عايزه ابدالك مو شيتا غريب وعجيب
ده شيتا كلو شين فى شين
هنا الزول العديل ونصيح وحاتك انت يا غاليه
بعيش حياتو يوماتى بى وشين
وزولتى الحتى حبيتها لقيتها براى تحب زولين
وايه يا يمه والله زمان
دي قشة عينى من النوم معاى بشيل هموم باكر
قبل ما اشيل هموم اليوم اختها خطواتى الأولى
اعدى الباب تدق طبول الهم
خواطر تذهل الألباب واقابلك يا شوارع الجن
وفى جوايا حاجة تئن اشد وتر الحزن واعزف
تموت غنواتى يا يمه ويخنقنى الغنا وأنزف
وتنتر فى العروق حمى خيال بيتنا القديم يرجف
صور تنزاح وتتلم وتانى وتالت آيمه
واشوفك بى خيال حالم تشاورى وترقص السبحة
ملامح العابد الصايم تشع فوق جبهتك سمحة
وشييك يحاكى ضى النور مزدان يمه فى الطرحه
وتبسمي لى أمد ايدى اقول اتلاقى يا السمحة
يتلاشى الحلم واصحى ويدفق عرق مالح
ويسكن فينى كل الهم واشم ريحة ندم جارح
وارفس عصفورة منجرحه فارقت الفضاء البارح
وتانى وتالت آيمه وهم كل المداين وهم
وهم غرقانه فى زخم الحضاره الغم
حضارة بتحصد الإنسان وتزرع فى مكانه نغم
وقصد القول .. يا شايل اللوم ويما جابنى للبندر
وحاتك انتى يا الغالية ده يوماً شوم
ولا بسنى الخجل من راسى لى كرعى
شايلو وأحوم وهادي الحالة فى الخرتوم
زي عايش شقى ومهموم .

تباريح الهوي

ده الجانى منك ومن تباريح الهوى ، …وصفو بصعب يا جميل

…وبعدت عنك ، ولما طال بى النوى ،

بقى لى أسيبك مستحيل ، ..تبقى سيرتك هى الكلام ..

وتبقى صورتك هى الرؤى الحلوة البعيشها

فى صحوتى ، او حتى فى عز المنام

ويبقى اسمك هو الغنا ..هو البجفف لى عذابات الضنى ..

ما الشفتو منك يا منى الروح يا أنا ،

وصفو بصعب يا جميل .... وبعدت عنك ....

ولما طال بى النوى ..بقى لى أسيبك مستحيل

***

بشكى ليكم يا مظاليم الهوى ..أصلى مجروح مرتين ،

.يمكن القى الزيى فيكم

ضاق جراح الحب ومتعذب سنين ..ويمكن القى وصفة تنفع

.. ولا يمكن القى حاجة تخفف الجرح القديم ..

حاجة تشفع ..

**

ده الجاني منك ومن تباريح الهوى …وصفو بصعب

يا جميل ..وبعدت عنك ، ولما طال بي النوى

بقى لى أسيبك مستحيل ..

الخرطوم
يا جمال النيل والخرطوم بالليل

ياراضعة من نيلين حضنوك من أزمان

يا قبلة الزائرين يادرة السودان

ضمخ شذى الياسمين والورد والريحان

عشاق سمر بالليل سحرم جمال النيل

أجمل ليالي هنا لما القمر يظهر

والونسة تبقي غنا والغنوة تتنقل

وتفوت علي أمدرمان وهناك تكون أجمل

لوبس تطول ياليل وتزيد جمال النيل

شن قولك معاي

أها !! شن قولك معاي !؟
قبلت جاي ..
قبلت جاى ..
القاك حداى .. شن قولك معاي !؟
والعمير الباقي منو
ما يكفي احكيلك حكاية الوعد القبيل
القلتو ليك وكتبتو في طيات غناى
وشن قولك معاي !!
يا رحلة الزمن الردى
يا سُبة العمر الشقي
خمسين سنة وازيد
وانا واقف على بوابة الافراح
لافتوحها شان ادخل
لا سدوها شان امشي
سنين شايل معاي جراح
واقف وبتأمل
مدارات العمر بتمر
وانا وبوابة الاحزان
حكايات من سنين ضاعت
ولو باقي العمر بيحوق
بكلمكم عن الدنيا والفيها
بالظاهر يشوفوا الناس وخافيها
واحجيكم عن الخلان
واونسكم عن الحبان
عن اماتنا واولادهم
عن خالتنا واخواتهم
دويمنا .. وبخت الرضا
عن (البرزيخ) و (مبروكة)
عن البنطون .. و (طه جقون)
وحلة خدرة مفروكة
عن النفاج..
زريبة العيش ..
وعن سعدية بت الحاج
و (حاجة حليمة) وعم (مُركز)
عن الشغيلة والعتالة والمشرع
وعن تقابة للحيران
وحلقة نوبة في (عرشكول)
وفي شبشه حدا القيزان
عن الترعة
وعن المرتع
زمن ضاع مني ما برجع !!
وشن القول مع الرايحين والجايين
وشن القول مع الشفع
قبلت جاى.. قبلت جاى
القاك مصاقرني في حداي
وشنو الداخرنو لي باكر ؟!
وباكر مهما طال اليوم
باكر جاي زي الموت
لو ما هسه او بعدين بعد باكر
وحقو تكون كمان فاكر
عقاب الدنيا يوت ممجوق
زمن جبار زمن كافر
نكابس فيهو يعصرنا
يكابس فينا ونعافر
وقبلت جاي ... قبلت جاى
القاك حداي ..
وشن قولك معاى
لما تعاين في شروق الشمس
وما تغسل عيونك بي شعاعا !!
ولما تشوف القمرة تحضن في السحاب
وما يبهرك القاها وضياها !
ولما تحاصرك نفسك كل يوم
في لجة الشك والمتاهة
ولمن تجيك اذاعات الدنيا في بيتك
بي خبر القنابل والكوارث والمجاعة
وانت ماهماك كأنو الامر
تمثيل او اشاعة !
اها !! شن قولك معاى !

ليه كل العذاب

ليه كــــــــــــل العذاب ليه كل الألم
بزرع في المحبة وحصادي العشم
ليه كل العذاب ليه كل الألــــــــــــم
لسه الفرقة حاصلة وبقاسي الألم

الدرب المشيتو مشيتو عشانــــــك
عذب وزيد عذابك يا سلطان زمانك
عذب وزيد عذابك يا جبــــار زمانك
كل ما أجيك داني كايس لــي حنانك

تبعد مني تقسى وتزيد الألم ألــــــم

لو تعرف يا ظالــــــــ بحبك قدر إيه
بحبك والله عالم ده حب احترت فيه
بحبك زي عــيوني ولو سألوني ليه

لأنك في عـــــيوني في عيوني الألم

عذب فيني بالغ وزيد مــــــنو الكتير
لو يرضيك آذاي عــــــــــذب يا أمير
قالو البهوا دايماً يـــاما يشوف كتير

وشفــت غلاوتي عندك وحبيت الألم
ليه كل العــــــــــــــذاب ليه كل الألم
بزرع في المحبة وحصادي العشــم
ليه كل العــــــــــــــذاب ليه كل الألم
لســـه الفرقة حاصلة وبقاسي الألم
لســـه الفرقة حاصلة وبقاسي الألم
لســـه الفرقة حاصلة وبقاسي الألم

أظلم من ظلم

كم شفت من مجهول مصير
وشفــت ياما شــفــــــت كم
انا شفت ناس ظالمين كثير
بـــــــس أنت أظلم من ظلم
انا تانى ما بـــــــــندم عليك
اصلو الــــندم بـيـــفيد شنو
ولمتـــــــين انا اتـرجى فيك
الزيى كـــــــــــــان رادك منو
لكن طباعـــــــــــك يا ضنين
لكن طباعـــــــــــك ما بتلين
جفوة ونفور وعذاب وسنين
وعمرو قلبك ما رحـــــــــــم
انا شفت ناس ظالمين كثـــير
بس انت اظلم مـــــــــــن ظلم
يا دنيــــــــــا يامــــا فيك ناس
بتــــــــــــــــقابل الريد بالجفا
يا دنـــيا ياما فيــــــكى نـــاس
اتعـــلــمـــــت قـــــــــــل الوفا
ويا دنـــــيا ياما فــــــيكى ياما
وياما فيـــــكى وبس كــــــفى
آه مــــــن جفاك .. خليت شنو
انا شــــــــــــــــــــــان رضاك
يا العــــــــــــمرو قلبك ما رحم
انا شــــــفت ناس ظالمين كثير
بس انت اظــــــــــــــلم من ظلم

أُمي الله يسلمك

أمى الله يسلمك
ويديكى لى طول العمر
وفى الدنيا يوم ما يألمك
امى الله يسلمك
مى يا دار السلام
يا حصنى لو جار الزمان ،
ختيتى فى قلبى اليقين
يا مطمنانى .. بطمنك
أمى الله يسلمك
خيرك على بالحيل كتير
يا مرضعانى الطيبة بالصبر الجميل
سا سعد أيامى وهناى
لو درتى قلبى أسلمك
أمى الله يسلمك
أنا مهما أفصح عن مشاعرى
برضو بيخونى الكلام
وقولة بحبك
ما بتكفى وكل كلمات الغرام
يا منتهى الريد ومبتداه
يا الليا الله يسلمك
ويديكى لى طول العمر
وفى الدنيا يوم ما يألمك
أمى الله يسلمك

ود الدويم كتب:

اخي حاتم
التيجاني حاج موسى هو وجه الدويم المشرق في عالم الادب و الشعر
حقيقة اتحفتنا بنقلك لبعض اشعاره الرقيقة
و يكفي التجاني شعرا ( تباريح الهوى )

الاخ ود الدويم

مشكور علي المرور
حقيقه التجاني حاج موسي هو واجه الدويم في عالم الادب والشعر وإن كان نعيب عليه عدم الكتابه عن الدويم المدينه إلا ان هنالك بعض القصائد في جانب من حياة الناس في الدويم مثل جواب للبلد

حاتم الشيخ كتب:

ود الدويم كتب:

اخي حاتم
التيجاني حاج موسى هو وجه الدويم المشرق في عالم الادب و الشعر
حقيقة اتحفتنا بنقلك لبعض اشعاره الرقيقة
و يكفي التجاني شعرا ( تباريح الهوى )

الاخ ود الدويم

مشكور علي المرور
حقيقه التجاني حاج موسي هو واجه الدويم في عالم الادب والشعر وإن كان نعيب عليه عدم الكتابه عن الدويم المدينه إلا ان هنالك بعض القصائد في جانب من حياة الناس في الدويم مثل جواب للبلد

ود الشـــــــــــــــــــــــــــــــــــــــــــــــيخ دى قمة الابداع الناقصها بس مناسبة القصائد ولو جزء منها وياريت تجتهد تجيبها على شان اكون شغل حصرى على الواحـــــــــــــــــــــــــة فقط ولك التيحة ولاستاذنا التجانى متعو اللة بالصحة والعافية .

صباح الخير


قول صباح الخير

وابدأ يومك بالتحية

هش وأبسم ..

وأطرد الهم والأسية

وأحضن الناس بى عيون ضاحكة ونديه

ياما بالكلمة الحنينة

ينفتح ليك الف باب

باب محنة وباب سعادة

باب أحبة وباب صحاب

تقضى يوم كلو فرحة

لا ملامة ولا أكتئاب

جرب أغفر للبخونك

تلقى أعدائك قلال

لقمة العيش النضيفة

تحلى بي كسب الحلال

إمتحان اجتازو وأصبر

مافى شىء عندك محال

الاخ منصور اولا مرحب بيك في منداك العامر (واحة الدويم) واكيد انك ستكون اضافه قوية لهذا المنتدي ونسأل الله ان تكون بخير وعافيه
مشكور جدا علي هذه الاضافه التي قمت بها لاشعار التجاني حاج موسي لاننا نحاول ان نوثق لهذا الشاعر الرقم الذي لا يمكن ان يتجاوز عندما يذكر الشعر في الدويم والسودان

اكرر شكري

لك منى تحيا خاصة ولكل رواد المنتدى وسلام يعلوة الفخر للاستاذ التجانى ولكل اشعارة واتمنى ان اكون اضافه حقيقيه لكم واتعرف اثر على اولاد بلدى

حقيقة شاعرنا التجاني قامة لاتطال ابدا مشكور اخي حاتم

جزاكم الله عنا ألف خير وعافية وكل عام وأنتم بخير ورمضان كريم وربنا يتقبل منا ومنكم صالح الأعمال ولكم التحية والأحترام أخوتى وأساتذتى الكرام ولكم كل الشوق والحنين وجعلكم الله تعالى ذخرا" للبلد والوطن وأنار الله عقولكم وقلوبكم كما أنرتم بجهدكم ومثابرتكم عقولنا وقلوبنا أنتم ومن أنتقلوا الى جوار ربهم لكم منا شكرا" وعرفان على كل حرف وتوجية قدمتموه لنا حتى أضحت مدينتكم العامرة بكم مدينة العلم و النور فلكم التحية على هذا المجهود الجبار ومبارك لكم الكبرى وربنا يجعله فاتحة خيرا" وبركة أما بعد فأنا شاكرة لأستاذ ى حاتم على هذا التوثيق العظيم لأشعار الأستاذ المفضال التجانى حاج موسى وأذكر قبل سنين مضت لم أكن أعرفه حتى تشرفت بزيارتة لنا فى الكلية فى ( برنامج له أسمة ساعة سمر) بمبانى الداخلية ولقد عرف نفسة بأنه من مدينة الدويم وألتفت الجميع نحوى أى زميلاتى وزملائى لأنهم يعرفون أننى من نفس المنطقة ولكن لم أكن أعرفة حتى سألنى أسمعتى بأمى الله يسلمك ؟؟ فقلت نعم . حينها قال: لى أنا شاعر هذة الأغنية أتعرفين وابور الز يت ؟؟ قلت نعم فقال : والمقابر فقلت نعم أعرفهم حينها قال هناك منزلنا وكان لى الشرف العظيم بتعرف على هذا النابقة ولقد سرنى ذلك أن أكون من نفس المنطقة وهى مدينة العلم والنور وقد فنى أبى و وأخواتى زهرة شبابهم ومازلن فى هذا السلك الرفيع ألاّ وهو سلك التعليم ونالوا قصبة السبق فى هذا المضمار وكانت مدينة الدويم ومازالت مدينة العلم والنور فالتحية لهم جميعا" من البحر الى الحفرو وأنا أستاذى حاتم لى خواطر وأشعار منذ كنت فى الثانوى وحتى وأنا فى المهجر أكنب خواطر فالو جاز لى التعبير أن أسميها أشعار فأستاذنكم أن تسمحوا لى بنشرها على مسهمات هذا المنتدى العظيم ولكم حق النقد وتعليق عليها وتوجيهى ونصحى لأننى لست بشاعرة كما أ ستاذى التجانى ولكم منى كل الود والتقدير والأحترام ياأ ساتذتى الكرام

جيدا" جيت حبابك عشرة ----------- وياأبودقلة ومليح الجيت ------------ياغرة عيونا وياركازة عمود البيت ---------يادخرينا أنت أخونا أنت أبونا ------------------ جيدا" جيت ----------سنين فى الغربة كم عانيت وكم قاسيت من حرمان ومرارة رةيت------------ دحين ياأخونا أطوى الغربة البغيضة بعيد --------------- وافتح صفحة المستقبل الزاهر بأذن الكريم ومجيد------------ وأمسح دمعة الماضى بأصرار وعزم عنيد --------------------- جيدا" جيت حبابك عشرة يابدر الدويم هليت عشان خاطر قلوبا" مقاسيه معاك من سافرته وأتغربت ياصباح العيد *******ياعمدة كتيرنا ياكوفينا يا دخرينا يازينة الرجال *************يافخر القبيلة الطله----------- ياظل الأراك الختة يانجل العشارى الفكة ***********أنت أبوك قبيل فارسا"بخوض العكة *************أحزم الربطة يا خو الملكة ماتنفكة *************ياركاب على سرج البيطوى السكة************* ياجليس صيد البرارى المسكو فاح فى الحتة----صوت الصاعقة أخوى أنا أخو العفاف الملكة *********وأملنا ومنانا نشوفك فى بيت الحلال والدبكة تزور النبى وتسعى وتطوف بيت مكة***********وعيد الفرحة تانى لديارنا اللصارت مبكى ************وعيد الفرحة تانى وعقبال السماء اليندكه********** واجمع لينا لحبات عقد الأخوه الأنفرط من زمان ونفكة **********وأقطف لينا من خارج حديقة العايلة زهره جميلة حلوه أصيلة تزين بيها للبيت الكبير يابشير *********وتفرح بيها لقلوبا" كساها الحزن وعسكر فى سماها كثير ************ويابشرانا يافرحتنا برجوعك ياضو البيت ************** وخلى الكان زمان شمتان فيك وفرحان بالحاصل بيك *************يبلع مرارة الحسره وندامه يزيد --------------وجيدا" جيت ومرحب بيك يابدر الدويم ضويت ايوم الثلاثاء الموافق0 2/5 /2005