عجائب الحب

أبو آية أخوي..

إنت شرحت بعض أنواع الحب.. وأسماؤها كما يلي:

- الشعلقة (الحب الأناني) : وهو أن تعشق من ليس لك.. وهو أقل ما يمكن قوله.. إنو نوع ما كويس..
- الصابر (الممكن تحمل عواقبه): وينقسم إلى نوعين:
النوع الأول: متفرع من العكليت.. يمكن "أن تنجرح ممن تحب".. وقديماً قالوا "ضرب الحبيب ألذ من أكل الزبيب".. يعني حتى كان جاك مسمار كعب عالي.. بتتحمّل.. وتبتسم.. لأنو عبّروك... وممكن تنجرح أكتر من مرة.. لكن بلسم الحب بيداويك.
النوع الثاني: إن انجرحت ممن تحب وما عبّرك تاني.. فالأحسن أن تديهو قفاك وما تعاين وراك.. عشان ما يرسلوا ليك الكعب التاني.
- الغائر: وهو أقسى الأنواع مجتمعة.. ينبّذك وينهزرك من تحب.. وأنت " تبتسم وأنت حزين".. ولا تملك في قرارة نفسك شيئاً تتخذه...
- الما شغالين بيهو: وهو "أن لاتنسى من لايتذكرك".. أي يمعنى عكلتة من طرف واحد.. ولا أكثر من ذلك.
- المستحيل: وهو "أن تعشق المستحيل".. أي أن تتخيل ليك أي وش تقابلو.. كان في جريدة أو مجلة أو وش عابر أو حتى عود شجرة ناشفة وتتخيل وش من تحب.. وتعمل معاهو حبوكانا داخلية بينك وبين نفسك... وهذا النوع من أخصب المجالات للشعراء وأصحاب الحب العذري... كان شاف ليهو غنماية ساكت قاعة ترمرم في كوشة ممكن يتخيل وشّها ويرش ليهو معلّقة...

أجارنا الله وإياكم من كل ما ذكرت من الأنواع أعلاه.. وأعاننا على نزع العكليت من قلوبنا.. وأرجو أن تكون قد وجدت الجواب الشافي يا أبو آية...

مع خالص الود والفرفشة...