الــحــــنينــــة

أمي ياالوالدة الحنينة ،،، إنت شمعة تضوي لينا
إنت يابلســم جراحنا ،،، مين سـواك يحن علينا؟
الله رب النــاس حــباك ،،، بصفات حلوة ورزينة
وفي الكـتاب وصانا بيك ،،، مانقلك كلمة شـينة
وكيف نقولك كلمة شينة ،،، من بعد وصية نبينا
قال:أمك (قال:أمك قال:أمك)،،، إنت ياأمي الحـنـية
وكيف نقولك كلمة شينه ،،، ونحـن في حضنك ربينا
مانســيت زمن الطفولة ،،، وكت ماكنت تدلعينا
وتبقي طول الليل مساهره ،،، لوزعلنا تفـرحـينا
والعجيب لوكان مرضنا ،،، تبكي بالدمع السخينه
ياإله العالمين إحفظ أمي ،،، إحفظ أمي إحفظ أمي
صاحبة القلب الحنين ،،،إحفظا وخـليها لينا

بقلم الأخ :أبوحــامد

امي يا حباً اهواه يا قلباً اعشقُ دنياه

يا شمساً تشرق في افقي يا ورداًفي العمر شذاه

ماذا اتذكر يا امي لا يوجد شياً انساه

فالماضي احملُ ازهاراً والحاضر تبسم شفتاه

لكم التحيه جميعا والتقدير ولكل امهاتنا وفى حضره الام يطول الحديث ولانستطيع ان نوفيها حقها ولو جمعنا كل كلمات الحب والتقدير والامتنان والشكر

والله يابكري بيني وبينك الجرسلين حاصل ربنا يصبر الشباب

مِنُو الغيرِكْ ؟؟


-----

مِنُو الغيرِكْ ؟؟

بِيَدخِلْ فينا كُلَّ البَهْجَه ..

يمنحنا الحنَانْ البصِّدِقْ ممهور

مِنُو الغيرِكْ ؟؟

وكِتْ يبسُمْ ..

تفِيض أفراحنا شُوق وسرور

مِنُو الغيرِكْ ؟؟

بِيَمْسَحْ دَمْعَة المحزُون

ويَنْشُرْ في رُبَانا عُطور

مِنُو الغيرِكْ

بِيَكتُلْ للحُزُنْ جُوَّانا

يهدينا السَّعاده بحور

مِنُو الغيرِكْ لمَََنْ نزعَلْ

بِيَضْحَكْ من عمِيقْ جُوَّاهُ

لا تمثِيلْ ولا مجبُور ؟!

عشان نَضْحَكْ

نعيد البَسْمَه مِنْ أوَّلْ

فرَحْ زَاخِرْ ..

جمَالْ مَوْفُور

مِنُو الغيرِكْ ؟؟

عشان تحصِينا مِن العين

قَرَا الفاتحَه ..

وطَلَقْ كُلَّ النَّواحِي بخور

مِنُو الغيرِكْ ؟؟

بزِيلْ وحشَتْنَا في الظُلمَاتْ

ويشْلَعْ في سَمَانا النُّور

****

مِنُو الغيرِكْ ؟؟

صبَرْ مِنْ كنتَ في الأرحام

لَمَّنْ خَلاصْ تَاتيتْ

مِنُو الغيرِكْ ؟؟

بقُولْ تاتي وموَشِّحني الأمَلْ

مِنْ قُمْتَ مِنْ شَبّيتْ

مِنُو الغيرِكْ ؟؟

بسَاهر الليلْ يحَجِّيني ..

ويَسْرَحْ في الحَكاوِي بعيد

يِلُولِيني ..

ينَادِي النُّومْ تَعَالْ وتَعَالْ

يقُولُّو أبيتْ

مِنُو الغيرِكْ ؟؟

بكتِّرْ لينا في الدَّعوَاتْ

يشيل اللِّيلْ صَلاه وبرَكاتْ

مِتين تَكْبَرْ أشُوفُو جَنَاك

يفرِّحْني ويعَمْر البيتْ

مِنُو الغيرِكْ ؟؟

وكِتْ خَطَواتي تِتْأخَّرْ

يقِيفْ قِدَامِي يِتْحَسَّرْ

يقُولْ يا ريتني كان يا ريت

مِنُو الغيرِكْ ؟؟

حَنَان مَرْدُوم !!

دَهَبْ مختوم !!

عَشَقْ منظوم !!

عِقِدْ سُومِيت

منو الغيرك ؟؟

مِنُو الغيرِكْ ؟؟

مِنُو الغيرِكْ سماح

يا يُمَّه زِينة البيت !!


التحيه لكل الامهات

شعر / محمد زين العابدين أبو جديري