إقتراح لكل أعضاء المنتدي

أحبايْ أعضاء منتدانا العامر دوماً بكم السلام عليكم ورحمة الله وبركاته أدعوكم لأن نفرق شويه في رمضان ده

من أجل النكته من أجل الضحك والمزح مع بعض رايكم شنو في الإقتراح ده

أقترح أن يحكى كل واحد منا بالمواقف الطريفه التى مرت به فى حياته ونحكيها هنا فى المنتدى الثقافى

وأبدأ ليكم ............

كنت يوم من الأيام كالعادة بطلع من العمل الساعه 3:30عصراً ركبت من السوق العربى ماشي سوق ليبيا

بعد وصلنا لفة شارع الأربعين المقاعد الوسط بقت فاضيه قام الكمسارى يطقطق ورا للجماعه الركبو من الطريق

شوف الشلاقة دىعلى حسب ماراكب جنب الباب إفتكرت إنو فى واحد عاوز ينزل من الناس الورا قمت قلت

للكمسارى أقيف فى واحد عاوز ينزل بلغة الكمساري سسسسيسك سسسيسك سسيسك

طبعاً أخوك عامل فيهاعندو خفة دم وكده بساعد الناس على النزول بسرعه أها قام الكمسارى وقف الحافلة

يلا ياجماعه النازل منو حرك حرك ياعمك إلتفت يمين شمال مالقيت زول نازل طبعاً أنا الوقفت الحافله

والكمسارى يكورك مافي حد نازل قمت إتوكلت ونزلت في نص المسافه عليك الله شوفت ليك خفه ذى دى

زمااان.. في أيام الشتاء.. ودّيت الأولاد للمستوصف عشان كان عندهم التهاب ونزلة... دخلنا على دكتور هندي.. وسألني عن اسم الأول وأجبته بكل ممنونية واعتدال... فحص عليهو وكتب الروشتة.. ولما سألني عن اسم التاني..وهي الابنة هبة.. التفت بسرعة لزوجتي وسألتها بكل براءة..دي اسمها منو؟؟ انتبهت الممرضة الفلبينية للسؤال..وطيّرت عيونها.. وطوالي سألتني: إنت نسيت اسم بنتك؟؟!!!
وطلعنا بعد ما كشفنا عليهم.. وتركنا الدهشة مرسومة في عيون الممرضة..
ورمضان كريم،،،