خاطرة - اختار هواك

[size=18]
[center]

ما هان علينا
تجينا راجع تاني
وخاطرك منكسر
يا غالي..
مكانك فوق راسنا.. عالي
محفوظ جوة..
في قلوبنا
وفي عينينا..
كنّا بندورك
وكان منانا
تكون معانا
إلا هجرانك وصدّك
والغرور البان في جورك
توّه الريدة اللي بينّا
وجفّف ينابيع هوانا
****
ترمي لومك على القدر ؟؟!!
القدر وداك لزول
صال وجال في درب المستحيل
قال ليك عايزك.. ما بحيد
دايرين سوا نمشيهو..
نسلك الدرب الطويل
ننقش درر.. نفرش ورود
شعاعه حب
خُطانا ريد...
لكن عنادك.. والجفا
الجابو ليك.. قلباً رحيم
زاد البعاد.. شدّاك رسن
ودّاك تجري ورا الزول البديل
خلّيت وحيدك للمحن
مغلوب وشارد.. يعاني من
طعنات سهام اتمكّنن
***
سافر سنين..
فجّ المسافات والزمن..
ويوم عودتو
يومو الرّجع..
يوم عرسو.. يوم زانو الفرح
جيت ليهو.. أو.. جابك قدر..
محتار.. وحيد.. معزول براك
جيت ليهو راجع منكسر
وعيون مشبّعة بالحزن
فضحت أساك...
***
رغم السرور البادي فيهو
والسعادة الجابا بالباب العديل
حسّ بشقاك
غالب مشاعر عودتك
وبرجعتك.. اختار هواك
وسط المعازيم والأهل..
اختار هواك..
وكان حبه قدامهم عَيَان
أكبر دليل..
***
اختار هواك
بعد البنين.. وطول السنين..
بعد البنيةّ والوليد
والحفيد..
لسه في هواك..
برضو بيحبك
وقدرو إنو بيريد هواك
ومكتوب عليهو..
في دنيتو ما يحب أبد..
زولاً سواك

دايماً خواطرك تخلي الواحد يقرأها ويتأملها جيداً لأنها بتحوي قيمة الكلام الموزون وقيمة المحبه الصادقه.

لك التحيه والتقدير ومزيد من الخواطر يعني كتر لينا منها شويه ولاتبخل..