بدأت بت المدن تقول:
باب قيافاااااافا لابس بدلتو البنيه لي محل عملوا بيركب العربيه
بيعزم أصحابو يسهروا عندنا الليليه
في صالون مفرش وفيهو كم زهريه
بت الباديه:أبوي البيكرم الضيفان صباح وعشية
رباي اليتامى الهملوهم ميه
فرزاع عركة الحرب الخيوله سويه
غتاي مقنع الكاشفه الدموعه رويه
بت المدن:بابا بيمشي المكتب بيشوف أشغالوا
يوم يعزم أبوه يوم يعزم خالوا
يوم بريد ياكل مع أطفالوا
شكلو ظريف ولبسوا نظيف منظم حالوا
بت الباديه:أبوي بيخت على أبحوفاً بنشر التلوة
أبوي البفرج الكربه وبزيل البلوة
كم مارق مساكين من سنين الغلوة
وكم دردق ردايف للضيوف في الخلوه
بت المدن:بابا ظريف بيحبو أصحابو ناس فاهمينو
ذوقو كتير باسم ديمه مارق سنو
بيحب أطفالو فوقم جمله قسم حنو
بيجيب لينا الفواكه وكل شيء عاوزنو
بت الباديه:أبوي الماذكروه في شينه من قام
دايماً لضيوفو ضابح أم بذام
أبوي جبل الضرى للعوج لزام
نمر الخش أبوي الفي الفقر كزام
بت المدن:بابا الفضلوا مابننساهو ديمه نذكروا
بابا لساني عاجز عن مقادير شكروا
بابا الخيروا وافر وديمه رايق فكروا
عاليه وظيفتوا ظاهره شهرتوا للبفتكروا
بت الباديه:أبوي بيرتع الحدبه أبتبرةً فاقعه
أبوي البفرج الكربه وبيستر الواقعه
للعطشان أبوي مشروع مويتوا ذاكيه وناقعه
إيدوا رخيه لكن في المعارك صاقعه
بت المدن:بابا إسكيلوا عالي ودايماً لبستو البيخارا راقي قماشا
حلوة الجزمه فوقوا وبدلتو الحشاشا
مسدد رايو دايماً للغلط بيتحاشا
بت الباديه:أبوي أبواتوا فراس في المحاصه بيحرنوا
كم لله قسم للمساكين جرنوا
حجر الصاقعه أبوي يات التصادفو تدرنوا
تور بقر الجواميس البجر بي قرنوا
بت المدن:
بابا بيساعد المسكين وبشوف ليه وظيفه
بيسمح لينا دايماً نمشي رحله ظريفه
ما بيشاكلنا وماما ذاته لطيفه
شان ود أصل من عايله حرة شريفه
بت الباديه:أبوي المالو بازلو على عشيرو وجاروا
أبوي السمته راجيه من جدودو كباروا
أبوي البيدخل اليوم البتوقد ناروا
كم كسر رقاب نياق للضيوف في دياروا
موضوع: حوار بين بت الباديه وبت المدن 
الخميس 4 نوفمبر - 20:02
