خاطرة - خواطر ريد

الندم أوله انكسار
وانا ديمة
شايل ليك خواطر ريد
مليانة خوف
رغم الهزيمة
منتظر.. طول الدهر
كان درتني..
كان درت خاطرك أجبرو
ميل يا الحبيب
ميل للظروف
ميل للعواصف
عارفك شديد
وكمان عنيد
خليك نخلة سامقة
أوعك.. أوع.. أوع تنكسر
خليني أركب ليك قَدَر
أصارع أمواج السحاب
أقفّل أبواب السفر
واهديك تذاكر انتظار
في الآخر ألقاك يا أنا
ألقاك راجي ومنتظر
نعيش سوا
ونموت سوا
ونخلّد أروع انتصار

والله يا فوزي في الزمن دا ما موجود ذي الحاجات دي ؟؟؟

الزمن بقي زيييييييييييف وخداع . الناس بقت تموت من أجل جيبك التقيل.................................... وبس

علي العموم الخاطره جميله لكن مستحيله

أنصحك يافوزي خوي أن تعيش معاهو سوا لكن الله لا حرمنى منك ومن إبداعاتك دي سمعت إنوالجماعه جو ياريت الخواطر ماتقيف

أبو آية أخوي

والله الخواطر دي جزء من أسرتي.. وبنات أفكاري.. متى ما حان مخاض إحداهن.. تأتي بلا رتوش أو تعديل.. كان شينة أو سمحة.. لو كنت جالس مع الأولاد جلسة عائلية.. أو سائق.. أو في العمل.. أو أي مكان.. تجي الخاطرة نازلة طوالي.. عشان كدا تلقاني شايل ورقة وقلم معاي طوالي... عشان كدا ما تخاف يا أبو آية... أنا ضابح الكديسة من قولة تييت.

خلاص خليهم اسافرو واجو علي الدوام عشان تطلع الكلام الجميل ده

في الحالة دي.. أختي عبادية..

يصبح حالي كمن
يشكي حال نفسه
وشكواه تسعد آخرين
كيف أقدر على العيشة
ما الغربة دونهم غربتين

بترضيها لي يا أختي؟؟